ភ្នំពេញ៖ នាយករដ្ឋមន្ត្រី សម្ដេចធិបតី ហ៊ុន ម៉ាណែត នឹងដឹកនាំគណប្រតិភូជាន់ខ្ពស់កម្ពុជាធ្វើដំណើរទស្សនកិច្ចនៅសាធារណរដ្ឋកូរ៉េក្នុងខែឧសភាខាងមុខ តបតាមការអញ្ជើញរបស់ប្រធានាធិបតីប្រទេសនេះលោក យូន សកយ៉ល។
សម្ដេចធិបតីបានឱ្យដឹងក្នុងពេលសម្ដេចដឹកនាំកិច្ចប្រជុំគណៈរដ្ឋមន្ត្រីនៅព្រឹកថ្ងៃទី១៥ ខែមីនា ឆ្នាំ២០២៤នេះ នៅវិមានសន្ដិភាព រាជធានីភ្នំពេញ។
ទ៉ោះជាយ៉ាងណាសម្ដេចមិនទាន់បញ្ជាក់ថ្ងៃចេញដំណើរនៅឡើយទេ តែគោលបំណងសំខាន់នៃដំណើរទស្សនកិច្ចនេះគឺទាក់
ទងនឹងការទាក់ទាញអ្នកវិនិយោគពីកូរ៉េខាងត្បូងមកកម្ពុជា។
សម្ដេចថា៖ «យើងនឹងជជែកគ្នាពីការជំរុញការវិនិយោគពីកូរ៉េខាងត្បូងមកផងដែរ»។
សម្ដេចនាយករដ្ឋមន្ត្រីនៅតែរក្សាជំហរក្នុងការទាក់ទាញអ្នកវិនិយោគពីបរទេសមកកម្ពុជាបន្តទៀតដោយថាដើម្បីជំរុញនូវសេដ្ឋកិច្ចកម្ពុជា និងការងារជូនពលរដ្ឋ។
ចាប់តាំងពីខែកញ្ញា ឆ្នាំ២០២៣ មកដល់ខែកុម្ភៈ ឆ្នាំ២០២៤ មានក្រុមហ៊ុនបរទេសដាក់ទុនវិនិយោគនៅកម្ពុជាចំនួន១៧៣ ដែលមានទុនសរុបប្រមាណ ៤ ១៥០លានដុល្លារអាមេរិកដែលនឹងផ្ដល់ការងារដល់ពលរដ្ឋប្រមាណជាង១៧ម៉ឺននាក់ ជាមួយគ្នានោះយោងតាមរបាយការណ៍ក្រសួងការងារ៦ខែចុងក្រោយមានក្រុមហ៊ុនសហគ្រាស ចំនួន ៣៣១៣សហគ្រាសបានបើកដំណើរការនៅកម្ពុជាក្នុងនោះ១៦៣ជារោងចក្រកាត់ដេរ ដែលផ្ដល់ការងារដល់ពលរដ្ឋបានជាង ៧ម៉ឺន៧ពាន់នាក់៕
